រាជធានីភ្នំពេញ ៖ ការសម្តែងសិល្បៈវប្បធម៌កម្ពុជា-ថៃ ដើម្បីអបអរសាទរខួបគំរប់៦០ឆ្នាំនៃទំនាក់ទំនងការទូតរវាងព្រះរាជាណាចក្រកម្ពុជា និងព្រះរាជាណាចក្រថៃ បានរៀបចំឡើងដោយក្រសួងវប្បធម៌ និងវិចិត្រសិល្បៈ និងស្ថានទូតថៃ នៅសាលសន្និសីទចតុមុខ ចាប់ពីម៉ោង៣រសៀល ដល់ម៉ោង៥ល្ងាច ថ្ងៃទី១៨ ខែធ្នូ ក្រោមអធិបតីភាពលោកឃឹម សារិទ្ធ ទីប្រឹក្សាផ្ទាល់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងជារដ្ឋមន្ត្រីស្តីទីក្រសួងវប្បធម៌ និងវិចិត្រសិល្បៈ, លោកអ៊ុក សុជាតិ រដ្ឋលេខាធិការក្រសួងវប្បធម៌ និងវិចិត្រសិល្បៈ, លោកនិភិដ្ឋ ឥន្ទ្រសម្បត្តិ រដ្ឋមន្ត្រីក្រសួងវប្បធម៌នៃព្រះរាជាណាចក្រថៃ និងលោកប្រាសាស ប្រាសាវិនិច្ឆ័យឯកអគ្គរាជទូតថៃប្រចាំព្រះរាជាណាចក្រកម្ពុជា។
លោកនិភិដ្ឋ ឥន្ទ្រសម្បត្តិ រដ្ឋមន្ត្រីក្រសួងវប្បធម៌នៃព្រះរាជាណាចក្រថៃ បានថ្លែងសុន្ទរកថាបើកកម្មវិធីថា ក្នុងនាមប្រជាពលរដ្ឋថៃនាឱកាសចូលរួមខួបលើកទី៦០ នៃការបង្កើតទំនាក់ទំនងការទូតនៅថ្ងៃទី១៩ ធ្នូ ឆ្នាំ២០១០ គឺបន្តពង្រឹងបន្ថែមទៀតរវាងទំនាក់ទំនងជាមិត្តជិតខាងគ្នា និងមានភាពស្និទ្ធស្នាលជាមួយគ្នាជាយូរលង់ណាស់មកហើយនោះឱ្យកាន់តែមានលទ្ធផលល្អថែមទៀ ត ព្រោះតែយើងមានវប្បធម៌ ប្រពៃណី និងការគោរពជឿជាក់លើព្រះពុទ្ធសាសនាដូចគ្នា។ លោកជឿជាក់ថា ការសម្តែងសិល្បៈរួមគ្នានៅថ្ងៃនេះ នឹងបង្កើតឱ្យមានការពង្រីកកិច្ចសហប្រតិបត្តិការរវាងគ្នានិងគ្នាកាន់តែល្អប្រសើរគ្រប់ វិស័យ សំខាន់កម្មវិធីនេះបង្ហាញឱ្យប្រជាជននៃប្រទេសយើងទាំង២កាន់តែមានភាពស្រលាញ់ សាមគ្គីភាព និងការយោគយល់គ្នាកាន់តែខ្លាំងឡើង។ បន្ទាប់មកលោកឃឹម សារិទ្ធ រដ្ឋមន្ត្រីស្តីទីក្រសួងវប្បធម៌ និងវិចិត្រសិល្បៈថ្លែងថា នេះជាការសម្តែងតាមបែបវប្បធម៌ ប្រពៃណីដែលប្រទេសយើងមានរៀងៗខ្លួនដើម្បីបង្ហាញពីគ្នាទៅវិញទៅមក និងស្វែងយល់ពីគ្នាឱ្យកាន់តែច្បាស់ ហើយក៏មានរបាំសម្តែងរួមគ្នាជាមិត្តភាពផងដែរ។
ក្រៅពីកម្មវិធីសម្តែងសិល្បៈ សន្និសីទកាសែតមួយបានធ្វើឡើង ហើយលោកឃឹម សារិទ្ធ បានបញ្ជាក់ថា នេះជាលើកទី២ហើយដែលប្រទេសទាំង២បានសម្តែងសិល្បៈរួមគ្នានៅសាលចតុមុខ បន្ទាប់ពីទីក្រុងបាងកក។ យើងមានប្រពៃណីប្រហាក់ប្រហែលគ្នាមែន តែយើងមានក្បាច់រាំខ្លះខុសគ្នា តែសំខាន់គឺការពង្រឹងទំនាក់ទំនងមេត្រីភាពរវាងគ្នានិងគ្នាឱ្យកាន់តែមានភាពល្អប្រសើរឡើង ថែមទៀត បន្ទាប់ពីថ្នាក់ដឹកនាំនៃប្រទេសទាំង២បានជួបគ្នាដោះស្រាយបន្ធូរភាពតានតឹងកន្លងមក គឺឱ្យវិលទៅរកសភាពដូចដើមវិញ។ លោកបន្តទៀតថា ពេលនេះវិស័យវប្បធម៌ប្រៀបដូចជាស៊ីម៉ង់ត៍រស់សំរាប់ផ្សារភ្ជាប់ប្រជាជនប្រទេសទាំង២ និងជាតិដទៃៗទៀតឱ្យមករួបរួមគ្នាគ្រប់លំដាប់ថ្នាក់ និងគ្រប់វិស័យ រស់នៅជាមួយគ្នាឱ្យដូចបងប្អូន។ ពេលនេះជាឱកាសពិសេសសំរាប់ពង្រឹងសម្ព័ន្ធមេត្រីភាព ប្រជាជននៃប្រទេសយើងទាំង២កាន់តែមានភាពជិតស្និទ្ធ និងស្រលាញ់គ្នាថែមទៀត។
ចំណែកលោកនិភិដ្ឋ ឥន្ទ្រសម្បត្តិ ថ្លែងថា សម្ព័ន្ធមេត្រីភាពមិនមែនមានតែសិល្បៈវប្បធម៌ប៉ុណ្ណោះទេ ហើយកម្មវិធីនេះគ្រាន់តែជាការចាប់ផ្តើមបន្ទាប់ពីនាយករដ្ឋមន្ត្រីនៃប្រទេសយើងទាំង២បាន ជួបគ្នាកន្លងមក ហើយវិស័យផ្សេងៗទៀតកំពុងតែជួបគ្នាបន្តរួមគ្នាពង្រឹងសម្ព័ន្ធមេត្រីភាពនេះដូចៗគ្នា ។ យើងគ្រប់គ្នាមិនមែនជាអ្នកកំណត់រឿងនយោបាយអ្វីឡើយនៅពេលនេះ។ លោកបានបន្តទៀតថា នៅឆ្នាំខាងមុខនេះ ប្រទេសថៃនឹងបើកឱ្យមានការសម្តែងវប្បធម៌រួមគ្នា៩ប្រទេសក្នុងអាស៊ាន ដើម្បីស្វែងយល់ពីវប្បធម៌ និងប្រពៃណីពីគ្នាទៅវិញទៅមក សំខាន់ពង្រឹងសម្ព័ន្ធមេត្រីភាពឱ្យកើតមានពេញក្នុងអាស៊ានតែម្តង៕