ត្រូវគេបញ្ឈប់ពីនយោបាយ ព្រោះតែស្រស់ស្អាតពេក

បេក្ខនារីដែលចូលរួមប្រកួតប្រជែងក្នុងការបោះឆ្នោតជ្រើសរើសក្រុមប្រឹក្សាក្រុង នៅ អ៊ីរ៉ង់ ត្រូវបានគេបដិសេធលទ្ធផលឆ្នោតរបស់នាង ដោយសារតែនាងមានសម្រស់ទាក់ទាញខ្លាំងពេក បើទោះជាទទួលបានសម្លេងគាំទ្រគ្រប់គ្រាន់។

Nina Siahkali Moradi ត្រូវគេជឿថា ភាពស្រស់ស្អាតរបស់នាង បាននាំឱ្យគេដកបេក្ខភាពរបស់នាង

ទំព័រ Independent បានរាយការណ៍ថា នាង Nina Siahkali Moradi អាយុ ២៧ឆ្នាំ បានបញ្ចប់ការសិក្សាផ្នែកស្ថាបត្យកម្ម ទទួលបានសម្លេងឆ្នោតគាំទ្រ ១០,០០០ សម្លេង នៅក្នុងការបោះឆ្នោតរបស់ក្រុង Qazvin ប្រទេសអ៊ីរ៉ង់។ បន្ទាប់ពីជាប់ឆ្នោត នាងត្រូវបានគេដាក់ក្នុងលេខរៀងទី ១៤ ក្នុងចំណោមបេក្ខភាព ១៦៣នាក់ដែលបានចូលរួមប្រកួតប្រជែង។យោងតាមច្បាប់របស់​អ៊ីរ៉ង់  ក្រុមប្រឹក្សាក្រុងនឹងទទួលយកមនុស្សចំនួន ១៣ រូបដំបូងក្នុងបញ្ជីឈ្មោះ  ចំណែកអ្នកជាប់ឆ្នោតទី ១៤  គឺត្រូវដាក់ជាសមាជិកបម្រុងទីមួយ  ប៉ុន្ដែ នៅពេលចៅហ្វាយក្រុងបានឡើងកាន់កាប់តំណែង នាង Moradi ក៏ត្រូវបានដកហូត។មន្ដ្រីជាន់ខ្ពស់ម្នាក់របស់ Qazvin បានប្រាប់ទំព័រ Times ថា “យើងមិនចង់ឱ្យក្រុមប្រឹក្សាក្រុង ក្លាយជាទីលានបង្ហាញម៉ូដនោះទេ” ។ចលនាសិទ្ធិមនុស្សអន្ដរជាតិ នៅអ៊ីរ៉ង់ បានឱ្យដឹងថា ការបញ្ចប់សមាជិកភាពរបស់នាង Moradi គឺដោយសារនាង “មិនគោរពតាមច្បាប់របស់សាសនាអ៊ីស្លាម” ហើយរូបថតរបស់នាងនៅពេលឃោសនាបោះឆ្នោត គឺជាមូលហេតុដែលនាំឱ្យក្រុមបដិបក្សដែលជាអ្នកអភិរក្សនិយម លើកយកមកបដិសេធ។នាង Moradi បានថ្លែងប្រាប់កាសែតក្នុងស្រុកថា ៖ “មនុស្សជិត ១០,០០០នាក់ បានបោះឆ្នោតឱ្យខ្ញុំ ហើយតាមរយៈនេះ នាងខ្ញុំត្រូវតែក្លាយជាសមាជិកបម្រុងទីមួយរបស់ក្រុមប្រឹក្សាក្រុង” ។មកដល់ពេលនេះ ការសម្រេចចិត្តមិនទទួលស្គាល់ខាងលើ កំពុងត្រូវបានពិចារណាឡើងវិញ ដោយសារតែការមិនទទួលស្គាល់លទ្ធផលឆ្នោតរបស់បេក្ខភាពដូចករណី Moradi គឺជារឿងមិនស្របច្បាប់។

បញ្ហាខាងលើនេះ ត្រូវបានគេមើលឃើញថា ជាវិញ្ញាសារសម្រាប់ប្រធានាធិបតីថ្មីរបស់អ៊ីរ៉ង់ គឺលោក Hassan Rowhani ដែលធ្លាប់បានអំពាវនាវឱ្យមានការតស៊ូដើម្បីសិទ្ធិស្ដ្រី។លោក Hassan Rowhani ធ្លាប់បានប្រកាស នៅពេលឃោសនារកសម្លេងឆ្នោតថា ៖ “ស្ដ្រីបានបូជាកម្លាំងកាយចិត្ដ ប៉ុន្ដែមិនទទួលបានសិទ្ធិស្មើគ្នា។ ខ្ញុំនឹងបង្កើតក្រសួងមួយដែលទទួលខុសត្រូវអំពីបញ្ហាស្ដ្រី ហើយប្រគល់សេរីភាពដល់ពួកគេ” ៕

ដោយ ៖ តារាប្រភព ៖ news.ninemsn