លោកអ្នកប្រហែលជាធ្លាប់បានស្គាល់កញ្ញា ទឹម រដ្ឋា ហើយមើលទៅ តាមរយៈខ្សែភាពយន្តភាគដែលបានចាក់បញ្ចាំងតាមរយៈកញ្ចក់ទូរទស្សន៍ នាពេលកន្លងមកនេះ។ ហើយថ្ងៃនេះយើងខ្ញុំសូមនាំលោកអ្នកអោយបានស្គាល់ប្រវត្តិត្រួសៗរបស់ស្រីស្អាតរូបនេះ។
កញ្ញា ទឹម រដ្ឋា ជាតារាសម្ដែង បង្ហាញម៉ូដ វ័យ ២៦ ឆ្នាំ មានកំពស់ ១ ម៉ែត្រ ៧០ ទម្ងន់ ៥០ គីឡូក្រាមកញ្ញាបានចូលប្រឡូកក្នុងវិស័យសិល្បៈតាមរយៈការទទួលជ័យលោភីពីកម្មវិធី ស្រីស្រស់ប្រុសស្អាត របស់ ស្ថានីយទូរទស្សន៍ CTN កាលពីឆ្នាំ ២០០៥។
ទឹម រដ្ឋា បានចាប់ផ្ដើមអាជីពសម្ដែងរបស់នាងដោយការថតខ្សែភាពយន្តជាច្រើនដូចជារឿង ”ដងស្ទឹងទឹកភ្នែក” ”ប្រពន្ធខ្មោច” ”រៀមកេរិ៍” ”នគរស្រីល្វោ” និង ខ្សែភាពយន្តភាគចាក់ផ្សាយនៅស្ថានីយទូរទស្សន៍ CTN ដូចជា រឿង ”ភ័ព្វសំណាង” ”ផ្កាក្នុងផ្កា” ”ដងវិថីតារា” ជាដើម។ ក្រៅពីអាជីពសម្ដែង កញ្ញា ទឹម រដ្ឋា ក៏មានគុណសម្បត្តិពីធម្មជាតិមួយផងដែរ គឺកំពស់ខ្ពស់ និងជើងដ៏ស្រលូនរបស់កញ្ញា ដែលអាចអោយកញ្ញាក្លាយជាអ្នកបង្ហាញម៉ូដបានយ៉ាងងាយ។
សព្វថ្ងៃកញ្ញា ទឹម រដ្ឋា គឺជាតារាបង្ហាញម៉ូដមួយរូបក្នុងក្រុមហ៊ុន Cambodia SuperModel ដែលជាក្រុមបង្ហាញម៉ូដដ៏ល្បីដែលមានតារាល្បីៗចូលរួមដូចជា អ្នកស្រី ចន ច័ន្ទលក្ខិណា អ្នកនាង លីម៉ារីណា អ្នកនាង ទូច ស្រីលក្ខណ កញ្ញា សារាយ សក្ខណា អ្នកនាង កែវ ពេជ្រពិសី ជាដើម។
មិនត្រឹមតែប៉ុណ្ណោះកញ្ញា ទឹម រដ្ឋា ក៏បានក្លាយជាគណៈកម្មការអោយពិន្ទុម្នាក់ក្នុងកម្មវិធីបវកញ្ញាសំបកកង់ BridgeStone របស់ទូរទស្សន៍ខ្មែរប៉ុស្ត៍លេខ ៩ ផងដែរ៕
ដោយ៖ ម៉ូកា