កូឡាឡុំពួ៖ ប្ដីប្រពន្ទជនជាតិម៉ាឡេស៊ីពីរនាក់បានចោទប្រកាន់ ពីបទវាយនារីក្រមុំធ្វើការតាមផ្ទះជនជាតិខ្មែរម្នាក់អោយមានរបួសយ៉ាងធ្ងន់ធ្ងរ។ នេះបើតាមសម្ដីមេធាវីជនជាតិម៉ាឡេស៊ីបាននិយាយកាលពីថ្ងៃពុធ ៣០ ខែឧសភា ឆ្នាំ២០១២។
ម្ចាស់ហាងអ៊ុតសក់ លោក Tan Mong Huwai និងនាង Eng Lay Sang ជនជាតិម៉ាឡេស៊ីដែលមានអាយុ ៣៦ឆ្នាំដូចគ្នាត្រូវបានចាប់ចូលពន្ធធានាគាររយះពេល យ៉ាងហោចណាស់២០ឆ្នាំពីបទវាយដោយកាំភ្លើងទៅលើនារីក្រមុំ ជនជាតិខ្មែរដែលជាកម្មករធ្វើការងារតាមផ្ទះ។ នេះបើតាមសម្ដីមេធាវីលោក Hue Kok Chung។
បើតាមប្រភពពត៌មានប្រចាំថ្ងៃម៉ាឡេស៊ីបានអោយដឹងថា៖ កាលពីខែ សីហាមុននេះ នាង ជៀស ផល្លា ជាកម្មករធ្វើការនៅហាងនេះ ត្រូវបានម្ចាស់ហាងលោក Tan Mong Huwai យក ឆ្នាំងអ៊ុតអគ្គិសនី ខ្សែភ្លើងអាលុយមីញូម កាំបិតហាន់បន្លែ និងសម្ភារផ្ទះបាយវាយទៅលើរូបនាង។
តាមសម្ដីរាយការមួយបានអោយដឹងថា ប្ដីប្រពន្ទពីរនាក់នេះត្រូវបានដាក់ពន្ធធានាគាររយះពេលយ៉ាងហោចណាស់២០ឆ្នាំដូចគ្នា។ ប៉ុន្តែដោយសារនាង Eng Lay Sang មានផ្ទៃពោះនិង មានកូនតូចៗរហូតដល់ទៅពីរនាក់ ដូច្នេះទើបតុលាការតម្រូវអោយនាង បង់ប្រាក់ទៅតុលាការ ទើបអាចដោះលែងនាងមានសេរីភាពវិញនៅថ្ងៃ២៩ ខែមិថុនា ខាងមុខនេះ៕ដោយមានជម្លោះកាន់តែច្រើនឡើងៗ រវាងថៅកែម៉ាឡេស៊ី និងកម្មករតាមផ្ទះ ដូច្នេះរដ្ខាភិបាលប្រទេសកម្ពុជា ក៏ដូចប្រទេសឥណ្ឌូនេស៊ី បានផ្អាកបណ្ដោះអាសន្ននូវក្រុមហ៊ុន ដែលនាំពលករទៅធ្វើការក្នុងប្រទេសនេះ។
គួរបញ្ចាក់ផងដែរថា ប្រទេសម៉ាឡេស៊ីសព្វថ្ងៃ បាននាំពលករចំនួន ២លាននាក់មកពីប្រទេសក្រីក្រក្នុងតំបន់ អោយទៅធ្វើការក្នុងប្រទេសរបស់ខ្លួន ហើយដែលពួកគេភាគច្រើន ធ្វើការផ្នែកសំនង់និងមួយចំនួនធំទៀតគឺជាស្រ្ដីមេផ្ទះ៕
ដោយ៖ សារិនប្រភព៖ asiaone