ប្លែកៗ ៖ ជាមួយនឹងបច្ចេកវិទ្យាចុងក្រោយ ដោយបានបំពាក់នូវស្បែកពិតៗ ក៏ដូចជាដៃយន្តដល់ទៅ ៨ ត្រីយ៉ាវហ៊ឺសមុទ្រយន្ត អាចរស់នៅក្នុងទឹកយ៉ាងហោចណាស់ក៏មួយខែដែរ នេះបើតាមការអះអាងរបស់អ្នកសិក្សាស្រាវជ្រាវមកពីសហរដ្ឋអាមេរិក។
លើសពីនេះ បើតាមប្រភពសារព័ត៌មានបរទេស ស្កាយ បន្ថែមថាត្រីយ៉ាវហ៊ឺយន្តមួយនេះមានទំហំ ៥ ហ្វឺត ហើយនាពេលអនាគតដ៏ខ្លី វាអាចនឹងដើរតួយ៉ាងសំខាន់ក្នុងការឈ្លបយកការបំរើវិស័យយោធា ក៏ដូចជា ដើរតួសំខាន់ពីរផ្សងទៀតនោះគឺ សំអាតប្រេងដែលបានលេចធ្លាយនិងតាមដានបរិស្ថានជីវចំរុះក្រោមសមុទ្រ។
គួររំឭកផងដែរថា ការបង្កើតឡើងនូវ ត្រីយ៉ាវហ៊ឺយន្តមួយនេះ គឺអនុលោមទៅតាមគំរោងមួយដែលមានការចូលរួម ពីសំណាក់សកលវិទ្យាល័យជាច្រើន សំរាប់បំរើវិស័យកងទ័ពជើងទឹកអាមេរិក ដោយដឹកនាំដោយ Virginia Tech មានលោកសាស្រ្តាចារ្យ Shashank Priya ជាប្រមុខ។
គួរបញ្ជាក់ផងដែរថា ដោយបានបំពាក់នូវស្បែកស៊ីលីកូន ដើម្បីជាការការពារជម្រាបទឹកចូលទៅក្នុងប្រព័ន្ធដំណើរការ យ៉ាវហ៊ឺយន្តមួយនេះ វាអាចធ្វើដំណើរត្រាចចររបស់ខ្លួនបានដល់ទៅមួយខែ ដោយថាមពលដែលមានស្រាប់។
ដោយឡែក ប្រភពសារព័ត៌មានដដែលបានបង្ហាញថា នេះគ្រាន់តែជាការបង្ហាញសាកល្បងតែប៉ុណ្ណោះ នៅក្នុងអាងទឹក តែយ៉ាងហោចណាស់ ពួកយើងត្រូវការពេលវេលាពីរឆ្នាំទៀត ដើម្បីសំរេចអោយដល់គោលដៅ មុននឹងត្រីយ៉ាវហ៊ឺយន្តមួយនេះ ចេញប្រតិបត្តិការណ៍របស់ខ្លួន៕
ដោយ ៖ មង្គលប្រភព ៖ ស្កាយ