ចោរប្លន់ម្នាក់ ជាជនជាតិអាមេរិក បានគេចខ្លួនបាត់ស្រមោល ជាមួយនឹងប្រាក់ជាង ១០០០ដុល្លារអាមេរិក ក្រោយពីបានអង្គុយរទេះរុញសម្រាប់ជនពិការជើង ទៅប្លន់ធនាគារ។
កាមេរ៉ាសុវត្ថិភាព បានបង្ហាញថា ជនល្មើសជាបុរសវ័យក្មេង អាយុប្រហែល ជាងម្ភៃឆ្នាំនេះ បានធ្វើដំណើរតាមរទេះសម្រាប់ជនពិការជើង មកកាន់ធនាគារ Santander នៅវេលាម៉ោងប្រមាណជា ២រសៀល។
រូបដែលគេថតចេញពីកាមេរ៉ាសុវត្ថិភាពរបស់ធនាគារ
មកដល់ភ្លាម ជនល្មើស បានហុចក្រដាស់មួយសម្លឹកទៅឱ្យបុគ្គលិកធនាគារ រួចក៏ទទួលបានប្រាក់ ១២០០ដុល្លារ។ នគរបាលឱ្យដឹងថា ជនល្មើសបានគំរាមថា ខ្លួនមានកាំភ្លើង ប៉ុន្តែជាក់ស្តែង គេមិនឃើញជននេះដកកាំភ្លើងចេញគំរាមនោះទេ នៅក្នុងពេលប្លន់។
ការគេចខ្លួនបានសម្រេចរបស់ជនល្មើសនេះ មើលទៅងាយស្រួលរហូតដល់នឹកស្មានមិនដល់ បើទោះត្រូវឆ្លងកាត់កន្លែងជាច្រើនក្នុងធនាគារ មុននឹងចេញផុតពីទ្វារ។ ប៉ុន្តែ ដោយសារមានកង់រទេះ ជននេះបានគេចខ្លួនក្នុងល្បឿនយ៉ាងលឿន សូម្បីតែនគរបាលដែលមានជំនួយពីកម្លាំងឧទ្ធម្ភាគចក្រក៏មិនអាចតាមទាន់។
បច្ចុប្បន្ន សមត្ថកិច្ចកំពុងស៊ើបអង្កេតដើម្បីឱ្យដឹងថា តើចោរម្នាក់នេះ មានអ្នកសមគំនិតនៅខាងក្នុងធនាគារដែរ ឬយ៉ាងណា។
ធនាគារ Santander
អ្នកនាំពាក្យខាងធនារគារ បានប្រាប់ឱ្យដឹងថា យើងខ្ញុំត្រេកអរ ព្រោះថា មិនមានអតិថិជន ឬបុគ្គលិកណាម្នាក់ រងរបួសក្នុងករណីនេះ។ យើងខ្ញុំមិនទាន់ហ៊ានអះអាងបែបណានោះទេ ដោយសារការស៊ើបអង្កេត កំពុងត្រូវបានធ្វើឡើង៕
ប្រែសម្រួលដោយ ៖ តារាប្រភព ៖ NYPost