អន្តរជាតិ ៖ សារព័ត៌មាន The Asiaone បានចេញផ្សាយកាលពីម្សិលមិញនេះ បានអោយដឹងថា អ្នកជំនួញប្រុស ក៏ដូចជាមហាសេដ្ឋីម៉ាឡេស៊ីដែលមានឈ្មោះថា លោក Jho Low ត្រូវបានរកអោយឃើញថា លោកបានចំណាយប្រាក់ដល់ទៅ ២ លានដុល្លារក្នុងការតាមចែចង់នារីដែលជាតារាល្បីរបស់តៃវ៉ាន់។
លើសពីនេះទៅទៀត បើយោងតាមរបាយការណ៍ដដែលបានបន្ថែមអោយដឹងផងដែរថា អ្នកជំនួញប្រុសជោគជ័យរូបនេះ បានចំណាយប្រាក់ដល់ទៅជាង ២ លានដុល្លារក្នុងការធ្វើកម្មវិធីជប់លៀងយ៉ាងអធឹកអធម នៅឯសណ្ឋាគារ ក៏ដូចជា រមណីយដ្ឋាន The Palm នៅក្នុងទីក្រុង Dubai ដើម្បីបញ្ជាក់ពីសាក្ខីភាពដែលគាត់មានចំពោះនាង ក៏ដូចជាចង់បង្ហាញពីក្តីស្រឡាញ់របស់ខ្លួនចំពោះនាងផងដែរ។
គួររំឮកផងដែរថា នារីជាជនជាតិតៃវ៉ាន់រូបនោះមានឈ្មោះថា Elva ហើយត្រូវបានរកអោយឃើញថានាងបានសម្រក់ទឹកភ្នែកនៅក្នុងកម្មវិធីជប់លៀងមួយនោះ ខណៈពេលដែលនាងរំភើប ក៏ដូចជារន្ធត់ខ្លាំងពេក ពោលគឺបន្ទាប់ពីមានបុរសពីរនាក់បានហោះចុះមកពីលើមេឃ ជាមួយឈុតគ្រឿងអល្លង្ការដែលមានតម្លៃ RM83,500 ស្របពេលដែលមានសំលេងកាំជ្រួចបានបន្លឺឡើង នាពេលនោះផងដែរ
មិនត្រឹមតែប៉ុណ្ណោះ នៅក្នុងរាត្រីនោះ ក៏មានការសម្តែង តាមរយៈការប្រគុំវីយ៉ូឡុងផងដែរ តែជាលទ្ធផល នាង Elva បានបដិសេធទៅលើសំណើរបស់អ្នកជំនួញជោគជ័យ វ័យក្មេងរូបនេះទៅវិញ ស្របពេលដែលនាងបានបញ្ជាក់ថា នាងចាត់ទុកគាត់ ដូចជាបងប្រុសតែប៉ុណ្ណោះ ។ ទន្ទឹមនឹងការបដិសេធនេះ បើយោងតាមភា្នក់ងារសារព័ត៌មាន បានបង្ហើបអោយដឹងថា នាងកំពុងតែមានទំនាក់ទំនងស្នេហា ជាមួយនឹងតារាសម្តែងប្រុសតៃវ៉ាន់ ដែលមានឈ្មោះថា លោក Kai Ko ហើលយមានពេលមួយនេះក៏ត្រូវបានអ្នកកាសែត តាមប្រមាញ់ព័តមានអោយដឹងផងដែរថា ពួកគេនឹងនាំគ្នា ទៅសម្រាកលំហែរកំសាន្តនាកោះ Bali នាពេលខាងមុខនេះ៕
ដោយ ៖ ពិសីប្រភព ៖ asiaone