ហុងកុង ៖ ដោយយោងតាមទីភ្នាក់ងារសារព័ត៌មានបរទេស CNN ដែលទើបតែបានចេញអត្ថបទរបស់ខ្លួន កាលពីប៉ុន្មានម៉ោងមុននេះ បានគូសបញ្ជាក់អោយដឹងថា នៅឯទីក្រុងហុងកុងឯណោះវិញ ត្រូវបានរកអោយឃើញថា មានភាពភ្ញាក់ផ្អើលជាខ្លាំង ខណៈពេលដែលកូនទាយក្ស ពណ៌លឿង ផុសត្រដែតខ្លួនឡើងនាកណ្តាលក្រុង ដោយបានទាក់ទាញចំណាប់អារម្មណ៍ភ្ញៀវទេសចរជាតិ និងអន្តរជាតិ។
គួរបញ្ជាក់ផងដែរថា កូនទាជ័រសិប្បនិម្មិតដ៏ធំមួយនេះ គឺជាសមិទ្ធផលស្នាដៃសិល្បៈរបស់វិចិត្រករជនជាតិហូឡង់ លោក Florentijn Hofman ។ យ៉ាងណាមិញ បើយោងតាមប្រភពសារព័ត៌មានដដែលនេះ ក៏បានគូសបញ្ជាក់បន្ថែមអោយដឹងផងដែរថា កូនទាជ័រយក្សដ៏ធំមួយនេះ ក៏បានធ្វើដំណើរទេសចរណ៍របស់ខ្លួន តាមទីក្រុងធំៗនៅលើពិភពលោកជាច្រើនមកហើយ ដែលនៅក្នុងនោះរួមមានដូចជា ៖ Osaka, Sydney, Sao Paolo និង Amster-dam ជាដើម។ ដោយឡែក វានឹងសំកាំងខ្លួនអួតដល់ភ្ញៀវទេសចរជាតិ និង អន្តរជាតិរហូតដល់ថ្ងៃទី៩ ខែ មិថុនា ដោយមានមូលដ្ឋាននៅលើកំពង់ផែ Victoria ក្នុងទីក្រុងហុងកុង ៕
ដោយ ៖ ពិសីប្រភព ៖ cnn