កូឡាឡាំពួរ ៖ យោងតាមគេហទំព័រសារព័ត៌មានបរទេស Asiaone.com បានចេញផ្សាយនាពេលកន្លងទៅអោយដឹងថា តារាចម្រៀងស្រីល្បី គឺនាង Jennifer Lopez នឹងមកសំដែង Concert ជាលើកដំបូងនៅក្នុងទីក្រុងកូឡាឡាំពួរ ដែលជាបេះដូងនៃប្រទេសម៉ាឡេស៊ី។
គួរបញ្ជាក់ផងដែរថា Jennifer Lopez នឹងសម្តែងនៅក្នុងការប្រគំតន្រ្តីនៅក្នុងប្រទេសនេះ ពោលគឺនៅថ្ងៃទី ២ ធ្នូ នៅឯពហុកីឡាដ្ឋាន Merdeka នាវេលាម៉ោង ៨ យប់ (ម៉ោងក្នុងស្រុកប្រទេសម៉ាឡេស៊ី)។
លើសពីនេះទៅទៀត បើនិយាយពីការមកដល់របស់ Jennifer Lopez បណ្តាប្រិយមិត្តដែលស្នេហាវិស័យចម្រៀង បា្រកដជាធ្លាប់បានស្តាប់បទចម្រៀងរបស់នាង ដែលទទួលបានការពេញនិយមទូទាំងសកលលោក ដែលនៅក្នុងនោះរួមមាន បទ Dance On The Floor ជាដើម។
គួររំឮកផងដែរថា Jennifer Lopez ក៏ធ្លាប់បានធ្វើជាគណៈកម្មការក្នុងកម្មវិធីប្រលងប្រជែង The American Idol ផងដែរ ខណៈពេលដែលរបាយការណ៍ ដែលបានផ្តល់ដោយគេហទំព័រសារព័ត៌មានមួយនេះ បញ្ជាក់បន្ថែមថា នាងពិតជាទទួលបាននូវភាពជោគជ័យយ៉ាងខ្លាំងក្នុងសង្គមសិល្បៈ ពោលគឺ នាងបានចេញផ្សាយនូវអាល់ប៊ុមបទចម្រៀងលើសពី ៥ ទៅទៀត ដោយបានលក់ទូទាំងសកលលោកបានដល់ទៅ ៧០ លានដុំឯណោះ នឹងបានរកប្រាក់ចំណូលបានដល់ទៅ ១៥០ លានដុល្លារផងដែរ។
កាលណានិយាយដល់នាង Jennifer Lopez លោកអ្នកប្រាកដជានឹកឃើញនូវ MV របស់នាងដែលទទួលបានការពេញនិយមទូទាំងសកលលោក ដូច្នេះ ដើម្បីរំឮកអនុស្សាវរីយិ៍នាពេលកន្លងទៅ សូមរីករាយទស្សនានូវវីដេអូបទចម្រៀងនេះសាជាថ្មីម្តងទៀតទៅមើល៕
ដោយ ៖ ពិសីប្រភព ៖ asiaone