ថ្ងៃនេះ Camnews សូមណែនាំខ្សែភាពយន្តថ្មីមួយជូនលោកអ្នកទាំងអស់គ្នាបានស្គាល់ដែលខ្សែភាពយន្តនេះមានចំណងជើងថា Tai Chi Zero ដែលខ្សែភាពយន្តនេះគឺជាខ្សែភាពយន្តចិនបូរាណដែលពេញដោយសកម្មភាពរស់រវើក។
ខ្សែភាពយន្តរឿង Tai Chi Zero ត្រូវបានដឹកនាំការសម្ដែងដោយកំពូលអ្នកដឹកនាំរឿងចិនលោកStephen Fung និងនិពន្ធដោយ Kuo-fu Chen ចូលរួមសម្ដែងពីតារាស្រីស្រស់ស្អាតនាង Angelababy តារាសម្ដែងមកថ្មី Yuan Xiaochao តារាជើងចាស់ Tony Leung Ka Fai និង Eddie Peng។
ក្នុងខ្សែភាពយន្តរឿង Tai Chi Zero នេះ Yuan Xiaochao សម្ដែងជា Yang Lu Chan ដែលបានធ្វើដំណើរទៅកាន់ភូមិ Chen ដែលជាភូមិដ៏ល្បីល្បាញខាងវិជ្ជាគុណ ហើយគោលបំណងរបស់គេគឺមានតែមួយគត់ ពិតណាស់គឺដើម្បីហាត់វិជ្ជាគុណដ៏ល្បីរបស់ភូមិ Chen ប៉ុន្តែជាអកុសលគេគ្រប់គ្នាប្រាប់មកគេវិញថា វិជ្ជាគុណរបស់ភូមិនេះមិនមែនសម្រាប់បង្ហាត់ដល់អ្នកក្រៅនោះទេ។ គេត្រូវធ្វើគ្រប់បែបយ៉ាងដើម្បីស្វែងរកគ្រូធំក្នុងភូមិហើយហាត់វិជ្ជាគុណភូមិ Chen នេះអោយបានដើម្បីព្យាបាលជំងឺរបស់គេ។
មិនត្រឹមតែជាខ្សែភាពយន្តបែបវាយប្រហារក្បាច់គុណរស់រវើកនោះទេ ថែមទាំងជាខ្សែភាពយន្តបែបកំប្លែងទៀតផង ហើយលោកអ្នកនឹងបានទទួលនូវទស្សនីយភាពជក់ចិត្តត្រជាក់ភ្នែកជាមួយបច្ចេកវិទ្យា 3D ទៀតផង។
ខ្សែភាពយន្តរឿង Tai Chi Zero នេះគឺជាភាគទី ១ ដែលនឹងនៅមានភាគទី ២ ទៀតដែលនឹងចាក់បញ្ចាំងជាបន្តនៅក្នុងខែវិច្ចិកាខាងមុខនេះដែលភាគទី ២ មានចំណងជើងថា Tai Chi Hero ដែលក្នុងភាគទី ២ អ្នកក្លាហាន Yang Lu Chan នឹងត្រូវធ្វើគ្រប់បែបយ៉ាងដើម្បីការពារភូមិ Chen ពីការកំទេចរបស់ទាហានបរទេស។ ជាមួយគ្នានេះផងដែររឿង Tai Chi Zero មានចាក់បញ្ចាំងហើយនៅរោងភាពយន្ត លេជេន ផ្សាទំនើប CityMall ជាន់ទី ៣៕
ដោយ៖ ម៉ូកា