ប្លែកៗ ៖ ដោយយោងតាមការដកស្រង់អត្ថបទសារព័ត៌មាន ដែលបានចេញផ្សាយគេហទំព័រប្លែកបរទេស spy បានអោយដឹងថា លោកយាយវ័យចាស់ ជន្មាយុដល់ទៅ ១០៦ ឆ្នាំបានរកឃើញស្នេហ៍ពិតរបស់ខ្លួន ខណៈមានទំនាក់ទំនងស្នេហាជាមួយនឹងលោកតាមា្នក់វ័យ ៧៣ ឆ្នាំ។
លើសពីនេះ ប្រភពសារព័ត៌មាន ក៏បានដកស្រង់សម្តីលោកយាយវ័យ ១០៦ ឆ្នាំ ឈ្មោះMarjorie Hemmerde ដែលជាពលរដ្ឋរស់នៅក្នុងប្រទេសអូស្រ្តាលីថា តាមពិតទៅ កាលពីពេលថ្មីៗនេះ គាត់ពិតជាមានទំនាក់ទំនងជាមួយនឹងលោកតា Gavin Crawford វ័យ ៧៣ឆ្នាំពិតប្រាកដមែន។
មិនត្រឹមតែប៉ុណ្ណោះ លោកយាយ Hemmerde បន្ថែមថា ពួកយើងពិតជាត្រូវរូវគ្នាខ្លាំងណាស់ ប្រៀបបានទៅនឹងមិត្តចាស់ជិតស្និទ្ធដូច្នេះដែរ ហើយបើនិយាយពីគម្លាតអាយុវាមិនចោទជាបញ្ហានោះទេ។
ដោយឡែក ក៏មានការបញ្ជាក់អះអាងទៅវិញ ពីសំណាក់លោកតា Crawford ផងដែរថាMarjorie ពិតជាបុគ្គលមួយរូប ដែលមានភាពរួសរាយរាក់ទាក់ជាខ្លាំង ខណៈនាងក៏មានទស្សនៈវិស័យដ៏ល្អនៅក្នុងជីវិតនាងផងដែរ។ មិនត្រឹមតែប៉ុណ្ណោះ នាងតែងតែលើកទឹកចិត្ត និង មានការកោតសរសើរជាខ្លាំង ហើយពួកយើងតែងតែសើចជាមួយគ្នា ខណៈពេលដែលបានដឹងថា ខ្សែជីវិតមួយនេះ មិនជាវែងឆ្ងាយណាស់ណានោះទេ ដូច្នេះពួកយើងត្រូវបន្តដើរទៅមុខរួមគ្នា ប្រកបទៅដោយភាពសប្បាយរីករាយ។
យ៉ាងណាមិញ មកទល់នឹងពេលនេះ គូស្នេហ៍មួយគូនេះ ក៏កំពុងតែរស់នៅរួមគ្នា នៅឯផ្ទះគាំពារចាស់ជរា នាទីក្រុង Melbourne ប្រទេសអូស្រ្តាលី៕
ដោយ ៖ ពិសីប្រភព ៖ spy