មិនគួរអោយជឿ ៖ ប្រិយមិត្ត មិត្តអ្នកអាន ប្រាកជជាជ្រាបច្បាស់រួចមកហើយកាលពីថ្ងៃទី១១កន្លងទៅនេះ ទាក់ទិនទៅនឹងអត្ថបទផ្សាយ សាកសពជ្រូកដល់ទៅ ៩០០ ក្បាលអណ្តែតពាសពេញទន្លេ។ ដោយឡែក នាពេលនេះ បើតាមការអោយដឹងពីគេហទំព័រសារព័ត៌មានបរទេសបានអោយដឹងថា ក្នុងរយៈពេលត្រឹមតែពីរថ្ងៃចុងក្រោយនេះ សាកសពសត្វជ្រូក ដែលបានអណ្តែតពាសពេញទន្លេ Huangpu ប្រទេសចិន បានកើនឡើងដល់ទៅជិត៦០០០ ពាន់ក្បាលដែលករណីនេះ បានធ្វើអោយមានភាពភ្ញាក់ផ្អើលទូទាំងផ្ទៃប្រទេស ក៏ដូចជាប្រព័ន្ធផ្សព្វផ្សាយអ៊ិនធើណេត។
លើសពីនេះទៅទៀត បើយោងតាមប្រភពសារព័ត៌មានដដែល បានបញ្ជាក់បន្ថែមអោយដឹងផងដែរថា ករណីខាងលើនេះ បានកើតមានឡើងកាលពីរាត្រីថ្ងៃសុក្រកន្លងទៅ ស្របពេលដែលមកទល់នឹងវេលាល្ងាច ថ្ងៃអាទិត្យ សប្តាហ៍កន្លងទៅ អាជ្ញាធរចិន បានស្រង់ចេញនូវសាកសពជ្រូកដល់ទៅ ២,៨១៣ ក្បាល ។ ដោយឡែក អ្វីដែលនឹកស្មានមិនដល់នោះគឺថាគ្រាន់តែអំឡុងពេល ២ ថ្ងៃចុងក្រោយនេះ សាកសពជ្រូកទាំងនោះ បានកើនឡើងជិតដល់៦០០០ ក្បាល ដែលវាជារឿងមួយពិបាកនឹងជឿ។
គួររំឭកផងដែរថា បើយោងតាមសម្តីមន្រ្តីជំនាញ បានអះអាងជាជំហានដំបូង អោយដឹងថាសាកសពជ្រូកទាំងនេះ ទំនងមកពីការចាក់ចោលចូលទន្លេពីសំណាក់ប្រជាកសិករ បន្ទាប់ពីពួកវាមានជម្ងឺឆ្លង រហូតដល់ថ្នាក់ស្លាប់បាត់បង់ជីវិត។ តែទោះជាយ៉ាងណាក៏ដោយ ក៏យុទ្ធនាការតាមដានស៊ើបអង្កេតនៅតែបន្តមាន ដើម្បីរកពីមូលហេតុពិតនៃការស្លាប់បង់ជីវិតរបស់សត្វជ្រូក ដែលមានចំនួនដ៏ច្រើនបែបនេះ៕
ដោយ ៖ រិទ្ធីប្រភព ៖ អាស៊ីវ័ន