ថ្មីៗនេះ អ្នកលេងអ៊ីនធើរណែតចិន មានការជជែកគ្នាយ៉ាងច្រើន អំពីរូបថតមួយដែលបង្ហាញពីនារីចិត្តល្អម្នាក់ បានត្រៀមខ្លួនជាស្រេចក្នុងករណីដែលនឹងត្រូវបញ្ឈប់ពីការងារ នៅពេលនាងឈរបាំងភ្លៀងអោយអ្នកសុំទានម្នាក់។
រូបថតរបស់នារីចិត្ដល្អម្នាក់នេះ ស្លៀកពាក់អាវពណ៌ស៊ីជំពូ សក់បែបកន្ទុយមាន់ ដៃកាន់ឆ័ត្រពណ៌សឈរបាំងភ្លៀងអោយអ្នកសុំទាន់វ័យចំណាស់ រូបរាងស្គមស្គាំងម្នាក់ ត្រូវបានអ្នកធ្វើដំណើរតាមផ្លូវថតបាន ក្រោយមក បានបង្ហោះលើទំព័រ Sina Weibo ដែលរូបថតនេះបានទាក់ទាញការយកចិត្តទុកដាក់យ៉ាងខ្លាំង។
City Evening News របស់ចិន កាលពីថ្ងៃទី ១៨មិថុនា បានរាយការណ៍ថា នារីនៅក្នុងរូបថតនោះមានឈ្មោះថា Cao Di បញ្ចប់ការសិក្សាកម្រិតមធ្យម និងកំពុងធ្វើការជាអ្នកបំរើតុ នៅភោជ្ជនិយដ្ឋានមួយក្នុងក្រុង Changchun ប្រទេសចិន។ ដោយឃើញលោកយាយអង្គុយសុំទាននៅក្រោមភ្លៀង ដ៏ គួរអោយអាណិត នាងក៏បានកាន់ឆ័ត្របាំងភ្លៀង បើទោះជាដឹងថា ខ្លួនអាចនឹងត្រូវបញ្ឈប់ពីការងារដោយសារកំពុងនៅក្នុងម៉ោងធ្វើការ។
រូបថតនេះត្រូវបានគេចែករំលែកពាសពេញគេហទំព័រសង្គម Weibo និងក្លាយជាប្រធានបទសំខាន់ក្នុងការយកមកជជែក។ សមាជិកម្នាក់របស់គេហទំព័រនេះ សរសេរថា ក្នុងពេលនោះ នារីនេះ មានសម្រស់បំផុត។
សមជិកម្នាក់ដែលមានឈ្មោះថា Choco Chao សរសេរថា រូបភាពដែលមនុស្សពីរនាក់ជ្រោកក្រោមឆ័ត្រតែមួយ ធ្វើអោយទិដ្ឋភាពភ្លៀងធ្លាក់បែរជាភ្លឺច្បាស់។ ខណៈនោះដែរ Red Moon 7077 ក៏បានបញ្ចេញយោបល់ថា ៖ យើងបានយល់ពីចិត្តសប្បុរសរបស់ពិភពលោក តាមរយៈនារីម្នាក់នេះ។
ទោះជាយ៉ាងនេះក្ដី Wang ដែលជាមិត្តរួមការងារម្នាក់របស់ Cao Di បានអោយដឹងថា ហេតុការណ៍នេះបានបណ្ដាលអោយ Cao Di ត្រូវបាត់បង់ការងារ។ Wang សរសេរថា ៖ខ្ញុំបានស្នើអោយ Cao Diជូនឆ័ត្រទៅអោយលោកយាយដែលជាអ្នកសុំទាននោះ និងវិលត្រឡប់មកភោជ្ជនិយដ្ឋានវិញ ព្រោះថា ពេលនោះគឺជាពេលកំពុងធ្វើការ។ ប៉ុន្ដែ Wang ចេះតែចង់នៅបាំងឆ័ត្រអោយលោកយាយម្នាក់នោះ៕
ដោយ ៖ សូរីយ៉ាប្រភព ៖ zing