ទស្សនាឆ្នេរខ្សាច់ Dune of Pyla ដែលមានកំពស់ ខ្ពស់ជាងគេនៅអឺរ៉ុប

Dune of Pyla គឺជាពំនូកឆ្នេរខ្សាច់ដ៏អស្ចារ្យ ធំល្វឹងល្វើយ និងខ្ពស់បំផុតនៅអឹរ៉ុប។ ឆ្នេរខ្សាច់នេះមានទីតាំងនៅតំបន់ Arcachon Bay ជាប់នឹងមហាសមុទ្រ Atlantic ឋិតនៅចំងាយ ៦០គីឡូម៉ែត ពីទីក្រុង Bordeaux ប្រទេសបារាំង។

ពំនូកឆ្នេរខ្សាច់ Dune of Pyla មានមាឌធំសម្បើមដល់ទៅ ៦០,០០០,០០០ ម៉ែតគុប ដែលមានទទឹងប្រវែង ៥០០ម៉ែត និងបណ្តោយវែងដល់ទៅ ២,៧០០ម៉ែត ហើយវាមានកំពស់ខ្ពស់ជាងនីវ៉ូទឹកសមុទ្រដល់ទៅ ១០៨ម៉ែត។ ឆ្នេរខ្សាច់ Dune of Pyla គឺដូចជាឆ្នេរខ្សាច់ដទៃ ដែលភ្ញៀវទេសចរអាចមកកំសាន្ត ដេកហាល់ថ្ងៃលើឆ្នេរ មុជទឹកកំសាន្ត និងស្រូបខ្យល់អាកាសបរិសុទ្ធ។ ដោយសារ Dune of Pyla ជាឆ្នេរខ្សាច់មួយ ដែលឋិតនៅជាប់មហាសមុទ្រ Atlantic អាកាសធាតុនៅទីនោះគឺសមរម្យ មិនក្តៅ មិនត្រជាក់ពេក អាចឲ្យភ្ញៀវទេសចរទៅកំសាន្តលេងយ៉ាងសប្បាយ។

ភាពស្រស់ស្អាតរបស់ Dune of Pyla បានធ្វើឲ្យវាក្លាយជាចំនុចសំខាន់មួយ ដែលទាក់ទាញភ្ញៀវទេសចរច្រើនជាង ១លាននាក់ក្នុងពិភពលោក មកទស្សនាជារៀងរាល់ឆ្នាំ៕